თბილისის მოდის კვირეული ქართველი დიზაინერებისათვის ნაყოფიერი აღმოჩნდა

უკვე 2 წელია რაც თბილისის მოდის კვირეული მიმდინარეობს ეკონომიის და მდგრადი განვითარების სამინისტროს მხარდაჭერით და მიზნად ისახავს ქართველი დიზაინერების უცხოელ მყიდველებთან დაკავშირებას. თანამშრომლობა საკმაოდ ნაყოფიერია და არც თბილისის მოდის კვირეულის მეთორმეტე სეზონს, რომელიც 2015 წლის, 8-11 ოქტომბერს გაიმართა, ჩაუვლია უშედეგოდ.

ეკონომიკისა და მდგრადი განვითარების სამინისტროს მეწარმეობის განვითარების სააგენტოს ინიციატივით ღონისძიებაზე ჩამოყვანილ იქნა არა-ერთი გავლენიანი მყიდველი, რომლებიც პირადად გაეცნენ ქართველი დიზაინერების 2016 წლის გაზაფხული/ზაფხულის კოლექციებს. ღონისძიება საკმაოდ ნაყოფიერი აღმოჩნდა წარმოდგენილი დიზაინერებისათვის, რადგან მოდის ინდუსტრიაში მოღვაწე საერთაშორისო ბრენდებთან მჭიდრო კავშირის დამყარების კუთხით კომპანიებს შესაძლებლობა მიეცათ გარკვეული მნიშვნელოვანი ნაბიჯები გადაედგათ.

ქეთევან ბოჭორიშვილის, საქართველოს ეკონომიკისა და მდგრადი განვითარების მინისტრის მოადგილის განცხადებით ძალზედ მნიშვნელოვანია რეგულარულად მოხდეს სხვადასხვა მყიდველის ჩამოყვანა და აქტიური კონტაქტის დამყარება ადგილობრივ დიზაინერებთან. მნიშვნელოვანია, რომ ქართული მოდის ინდუსტრიის ფარგლებში შექმნილ პროდუქციას ბევრი ადამიანი გაეცნოს და გაიზარდოს საექსპორტო პოტენციალი დივერსიფიცირებულ ბაზრებზე.

მეწარმეობის განვითარების სააგენტოს შუამავლობითა და ძალისხმევით ამჯერად კომპანია   “გეფერინი“ გახდა გერმანული და უკრაინული კომპანიების ინტერესის საგანი. მყიდველები ამ ეტაპზე განიხილავენ საექსპორტო ხელშეკრულების გაფორმებას. აღსანიშნავია, რომ მოცემული ეტაპისათვის კომპანია „გეფერინი“ საქართველოს მასშტაბით ოთხ მაღაზიას ფლობს, სამომავლო გეგმების კუთხით კი საექსპორტო პოტენციალის ზრდასა და მოცემული კუთხით საქმიანობის გაფართოებას გეგმავს, რასთან დაკავშირებითაც პირველი ნაბიჯები უკვე გადადგმულია, მათი პროდუქცია სოციალური ქსელების მეშვეობით მოსკოვში წარმატებით იყიდება და უახლოეს მომავალში მაღაზიაც იხსნება. დაგეგმილია ოფიციალური ვებ-გვერდის გაშვება, რაც კიდევ უფრო მეტად შეუწყობს ხელს პროდუქციის ეფექტურ რეალიზაციას. კომპანიის საწარმოო ნიშის გათვალისწინებით, უცხოელების მხრიდან მოდის კვირეულზე გამოხატული დაინტერესება დროული იყო და შესაბამისად შეუწყობს ხელს ბრენდის ცნობადობის ამაღლებას.

ეკონომიკისა და მდგრადი განვითარების სამინისტროს მეწარმეობის განვითარების სააგენტოს ძალისხმევის კიდევ ერთ შედეგი მილანში მოღვაწე კომპანიის „GUFFANTI CONCEPT SHOWROOM“-ის მხრიდან ქართული პროდუქციით დაინტერესება და თანამშრომლობის გაღრმავების სურვილია. რაც ყველაზე მნიშვნელოვანია, კომპანიას კონკრეტული შემოთავაზებებიც აქვს, ის ქართველი დიზაინერის, აკა ნანიტაშვილის (AKA NANITA) კოლექციის ჩვენებას მოაწყობს იტალიაში, ქალაქ მილანში, ხოლო ბრენდთან MATERIEL სამომავლო თანამშრომლობას ისახავს მიზნად.

აღსანიშნავია, რომ ტურიზმის ეროვნული ადმინისტრაციის მხარდაჭერით ასევე მოწვეულ იქნენ მოდის სფეროში მოღვაწე ჟურნალისტები, ვინც პოზიტიურად გააშუქეს თბილისის მოდის კვირეული.

აღსანიშნავია, რომ ეკონომიკისა და მდგრადი განვითარების სამინისტროს მეწარმეობის განვითარების სააგენტოს მხარდაჭერითა და ორგანიზებით მოდის კვირეულს უცხოელი მყიდველები მუდმივად სტუმრობენ და როგორც ფაქტები გვიჩვენებს სათანადოდაც აფასებენ ქართული მოდის ინდუსტრიის პოტენციალს და თანამშრომლობისთვის სამომავლო გეგმებსაც სახავენ. მეწარმეობის განვითარების სააგენტო თბილისის მოდის კვირეულს უკვე მესამედ უჭერს მხარს და ხელს უწყობს ქართული დიზაინერების ნამუშევრებისა თუ კომპანიების ნაწარმის საზღვრებს გარეთ გატანას, რასთან ერთადაც მსოფლიო ბრენდებსა და ქართველ დიზაინერებს შორის კავშირების დამყარებაში შეაქვს წვლილი.